Натамошен развој на концептот за следење на изборните ветувања: Искуства и научени лекции на општините и граѓанските организации
- Details
На 22 ноември 2023 г. во Велес се одржа промотивен настан на тема - „Натамошен развој на концептот за следење на изборните ветувања: Искуства и научени лекции на општините и граѓанските организации“ со цел промоција на постигнатите резултати од мониторингот на изборните ветувања на политичките партии, како и мобилизирањето на заедницата за барање отчет и исполнување на ветеното.
Бети Пеева, претседателка на ЕХО, го претстави моделот на ЕХО во мониторирање на општините, вклучувањето на жените во креирањето на политики и подготовка на родово одговорни буџети преку доставување и усвојување на родово буџетски иницијативи. Притоа ги презентираше успешните приказни и позитивната пракса од Општина Штип, а учесниците имаа можност да слушнат искуства за примена на различни мониторинг методологии и да ги збогатат своите знаења за начините и исходите од следење на активностите на локалните самоуправи.
Настанот беше дел од активностит кои се спроведуваат во рамките на проектот „Поддршка на изборните реформи во
Северна Македонија“ поддржан од Владата на Швајцарија и имплементиран од Меѓународната фондација за изборни системи (ИФЕС).
Работилница за вмрежување на мултисекторските тимови и стручните соработници за ефикасна заштита на жени и девојки изложени на насилство
- Details
Последниот квартален состанок за МТЗ за 2023 година беше надграден во дводневна работилница за вмрежување на мултисекторските тимови и стручните соработници за ефикасна заштита на жени и девојки изложени на насилство, кои ги координира ЕХО. Работилницата се реализираше во периодот од 8 - 9 ноември 2023 година во Охрид.
Учесниците – претставници од сите мултисекторски тимови на заедницата за ефикасна заштита на жени и девојки изложени на насилство, како и стручни соработници од општините Штип, Прилеп, Струмица и Гевгелија имаа можност за меѓусебно запознавање и вмрежување, истовремено стекнувајќи знаења и вештини за градење и развој на мрежи, тимска работа и ефикасна комуникација. Работилницата изобиливаше со интерактивни сесии и забавни тимски вежби кои на професионалците од релевантните институции им овозможија спонтана размена на информации, знаења и искуства што ќе им послужат за унапредување на меѓусебната соработка и координација во самите тимови, но и помеѓу тимовите од различни општини. Работилницата претставуваше и исклучителна можност за јакнење на довербата помеѓу претставниците на МТЗ и стручните соработници од различните општини, што е неопходен предуслов за ефикасна меѓусебна координација која води кон унапредување на ефикасноста во заштитата на жените и девојките изложени на насилство во општините и регионите каде делуваат овие тимови.
Работилницата е дел од серијата работилници и обуки наменети за јакнење на капацитетите на Мултисекторските тимови на заедниците за ефикасна заштита од насилство врз жени и семејно насилство, како и стручните соработници на ЕХО, во рамки на проектот „Сите заедно во градење на заедници без родово базирано насилство" поддржани од Шведска и Фондацијата Kvinna till Kvinna.
Ние сме сè уште тука за тебе
- Details
Изминатиот петок во Кино-салата ,,Мис Стон" во Прилеп, на нашиот отворен настан под кампањата „Ние сме сè уште тука за тебе“ имавме можност да се дружиме со Огнен Јанески и да разговараме за мултисекторскиот пристап на нашата организација за ефикасна заштита на жени и девојчиња изложени на насилство.
Им благодариме на нашите гости од ОВР Прилеп и Центар за социјални работи - Прилеп што ни се придружија во дискусијата и ја поддржаа нашата кампања.
--
Те охрабруваме, разговарај отворено и во сигурна средина.
Нашите експертски тимови се тука за да ти обезбедат бесплатна психосоцијална и правна помош.
Јави се за поддршка до потребната сигурност и безбедност.
Не заборавај, ние сме сè уште тука за тебе!
Во рамки на проектот Летна школа за млади објавена е публикацијата "Затоа што те љубам"
- Details
Затоа што те љубам-проект спроведуван од ЕХО, Едукативно-хуманитарна организација од Штип, во период февруари-ноември 2023година, поддржуван од Екуменска иницијатива на жени од Република Хрватска.
Затоа што те љубам–проект инспириран од најчувствителниот копнеж, водилката на животот, добротелот кој нè воскреснува – љубовта.
Затоа што те љубам –затоа што сакаме да ја споделиме љубовта, да се едуцираме, мотивираме, инспирираме и охрабриме од капацитетот на срцата човечки да љубат.
Затоа што те љубам–затоа што градиме врски чиј темел е љубовта, врски кои не толерираат насилство, туку врски кои лекуваат, обновуваат, облагородуваат.
Затоа што те љубам –летна школа за млади тинејџери кои своите таленти ги споделија несебично за целите на проектов и ги родија страниците кои следат.
Линк до публикацијата
Трет квартален состанок на Мултисекторските тимови на заедницата за ефикасна заштита на жени и девојки изложени на насилство
- Details
Третиот квартален состанок на Мултисекторските тимови на заедницата за ефикасна заштита на жени и девојки изложени на насилство, се одржа во Штип на 3 октомври 2023 година. Состанокот претставуваше можност членовите на МТЗ и стручните соработници од различните општини кои ЕХО ги координира (Штип, Прилеп, Струмица и Гевгелија), заеднички да разговараат и разменат искуства за актуелните теми со насилството врз жените и да направат проценка за функционирањето на механизмите за заштита на национално и на локално ниво. Заклучокот е дека последните години, особено по здравствената криза, заштитните механизми на национално ниво речиси сосема изостануваат, дека државата не го става во фокусот проблемот со растечкиот тренд на насилство врз жени и дека во некои општини каде мултисекторската соработка воопшто не е воспоставена, или е на многу ниско ниво, не постои соодветен институционален одговор и се бележат трагични настани изразени преку фемициди – убиства на жени само поради фактот што се жени. Сите учесници беа согласни дека моделот на мултисекторски интегративен пристап до пакетот неопходни услуги за жени и девојки изложени на насилство, воспоставен и развиен од страна на ЕХО, кој се потпира на заеднички прифатени принципи и стандарди на функционирање е ефикасен маханизам за навремена заштита на жртвите, спречување на насилството и соодветно санкционирање на сторителите. Реплицирањето на овој модел во другите општини би претставувало значаен чекор напред кон охрабрување на жените жртви и кон јакнење на довербата во системот на заштита, со што би се спречиле идни фемициди и случаи на насилства врз жени и девојки.
Кварталните состаноци на МТЗ за ефикасна заштита на жени и девојки изложени на насилство редовно се реализираат во рамки на проектот „Сите заедно во градење на заедници без родово базирано насилство“ поддржан од Шведска и Фондацијата Kvinna till Kvinna.
Page 2 of 14
